घुग्घुस ग्रामीण रुग्णालयाच्या उर्वरित बांधकामासाठी निधी उपलब्ध करून देण्याचे निर्देश*

*पालकमंत्री सुधीर मुनगंटीवार यांनी घेतली सामाजिक कार्यकर्ते ईबादुल सिद्धीकी यांच्या मागणीची दखल,

चंद्रपुर तालुक्यातील अतिप्रदूषित शहर म्हणून घुग्घुसची ओळख आहे.प्रदूषणामुळे नागरिकांचे जगणे कठीण होत चालले असून नागरिकांच्या सोयीसुविधासाठी येथे ग्रामीण रुग्णालय मंजूर करण्यात आले.मात्र आता शासनाने निधी अडविला असून कंत्राटदाराने रुग्णालयाचे बांधकाम बंद केले आहे.याबाबत सामाजिक कार्यकर्ते ईबादुल सिद्धीकी यांनी पालकमंत्री सुधीर मुनगंटीवार यांना निवेदन देऊन निधीची मागणी केली होती.त्यांच्या मागणीची दखल घेऊन पालकमंत्री सुधीर मुनगंटीवार यांनी संबंधित विभागाला निर्देश दिले आहेत.त्यामुळं लवकरच घुग्घुसच्या ग्रामीण रुग्णालयाचे बांधकाम सुरू होणार आहे.

घुग्घुस शहरात मोठमोठे कारखाने असून मोठ्या प्रमाणात येथे प्रदूषण होत आहे.अशातच 9 जून 2014 ला घुग्घुस शहरात ग्रामीण रुग्णालय मंजूर करण्यात आले.2 डिसेंबर 2021 ला प्रत्यक्षात बांधकाम सुरू करण्यात आले.मात्र शासनाने कंत्राटदाराचे बिल थकविले व निधी अभावी रुग्णालयाचे बांधकाम रखडले आहे.त्यामुळे कंत्राटदाराचे बिल मंजूर करून रखडलेला निधी शासनाने तात्काळ द्यावा व रुग्णालयाचे बांधकाम लवकरात लवकर पूर्ण करून नागरिकांना दिलासा द्यावा अशी मागणी सामाजिक कार्यकर्ते ईबादुल सिद्धीक्की यांनी केली होती.तसे पत्र पालकमंत्री सुधीर मुनगंटीवार यांना पाठविले होते.त्यानंतर मुनगंटीवार यांनी पत्राची गांभीर्याने दखल घेऊन लवकरच निधी उपलब्ध करून देण्याचे आश्वासन दिले आहे तसे पत्र ईबादुल सिद्धीकी यांना पाठवले आहे.