*त्या रिक्त पदांवर बेरोजगार डी. एड., बी. एड अभियोग्यता धारकांनाच संधी द्या* *आमदार सुभाष धोटेंची राज्य सरकारकडे मागणी*

*त्या रिक्त पदांवर बेरोजगार डी. एड., बी. एड अभियोग्यता धारकांनाच संधी द्या*

आमदार सुभाष धोटेंची राज्य सरकारकडे मागणी

✍️दिनेश झाडे

चंद्रपूर जिल्हा प्रतिनिधी

राजुरा:-जिल्हा परिषदेच्या शाळांमध्ये सेवानिवृत्त शिक्षकांची कंत्राटी तत्त्वावर तात्पुरत्या स्वरूपात नियुक्ती करण्याबाबत काढलेले परिपत्रक रद्द करून त्या पदांवर सुशिक्षित बेरोजगार डी. एड., बी. एड अभियोग्यता धारकांनाच संधी द्यावी अशी मागणी आमदार सुभाष धोटे यांनी राज्याचे मुख्यमंत्री एकनाथ शिंदे, शिक्षण मंत्री दीपक केसरकर यांना निवेदनाद्वारे केली आहे तसेच येणाऱ्या अधिवेशनात यासंदर्भात लक्षवेधी प्रश्न उपस्थित करून सुशिक्षित बेरोजगारांना न्याय मिळवून देणार असल्याची ग्वाही दिली आहे.

        गोंडपीपरी येथील हरिश नागापूर, विलास चौधरी, प्रविन बुर्रीवार, हंसराज वाकुडकर, तिरुपती लगोगवार, नितीन चौथाले, विनोद दुर्गे, नयन रामगोनवार, स्वप्नील धुर्वे, दिक्षा निमगडे यासह अनेक शिक्षक अभियोग्यताधारकांनी आ. धोटे यांची भेट घेऊन निवेदनाद्वारे अभियोग्यताधारकांवरील अन्याय दूर करण्याची मागणी केली. त्यानुसार आ. धोटे यांनी यासंदर्भात राज्यशासनाकडे पाठपुरावा केला असून सुशिक्षित बेरोजगार पात्रता धारकांवरील अन्याय दूर करण्यासाठी आपण सर्वतोपरी प्रयत्न करणार असल्याचे आश्वासन अभियोग्यताधारकांच्या शिष्टमंडळाला दिले आहे.

  दिनांक ७ जुलै २०२३ रोजीच्या शासनाच्या परिपत्रकात सदर नियुक्तीसाठी कमाल वयोमर्यादा ७० वर्ष असून त्यांना २० हजार रुपये प्रति महा मानधन देण्यात येणार सोबतच अन्य काही तरतुदी दिलेल्या आहेत. नियोजित शिक्षक भरती उच्च न्यायालयातील रिट याचिकांमुळे लांबल्याचे सरकारच्या निदर्शनास आले आहे. यामुळे पवित्र पोर्टल प्रणालीमार्फत नियमित शिक्षक भरती मधून शिक्षक उपलब्ध होईपर्यंत हा उपाय काढण्याचा निर्णय सरकारने घेतला असल्याचे सांगण्यात येत आहे. मात्र राज्यात मोठ्या प्रमाणात पात्रताधारक सुशिक्षित बेरोजगार असताना सेवानिवृत्त शिक्षकांना कंत्राटी तत्वावर नियुक्ती करणे चुकीचे आहे. त्यामुळे राज्य सरकारने सदर परिपत्रक रद्द करून त्या रिक्त जागांवर सीईटी पात्र असलेल्या उमेदवारांना तसेच पात्रता धारक डी. एड., बी. एड शिक्षकांना संधी द्यावी अशी मागणी आमदार सुभाष धोटे यांनी केली आहे.