घुग्गुस शहरातील बुक हाऊस व कपड्याच्या दुकानाला मध्यरात्री लागली आग

अंदाजे पाच लाखाचे नुकसान

चंद्रपूर तालुक्यातील घुग्गुस शहरातील जामा मस्जिद समोर असलेल्या सईद कॉम्प्लेक्स मधील इस्लामिक बुक हाऊस व कपड्याच्या दुकानाला मंगळवारी मध्यरात्री आग लागली. 

या आगीत अंदाजे पाच लाखांचे नुकसान झाले असून सुदैवाने मोठी जीवितहानी टळली आहे.या घटनेची माहिती घुग्गुस पोलिसांना मिळताच पोलीस निरीक्षक आसिफरजा शेख घटनास्थळी दाखल झाले.त्यानंतर अग्निशमन विभागाला पाचारण करण्यात आले व आगीवर नियंत्रण मिळविण्यात यश आले.

मिळालेल्या माहितीनुसार मंगळवारी रात्री 12.30 च्या सुमारास ही आग लागली असून शॉर्ट सर्किटमुळे ही आग लागल्याची शक्यता वर्तविण्यात येत आहे. दरम्यान या आगीत अंदाजे पाच लाखांचे नुकसान झाल्याची माहिती दुकान मालकाने दिली आहे.या घटनेचा पुढील तपास पोलीस करत आहेत.