उसगाव येथे महिला सरपंचांनी पकडली अवैध दारू,

* दारूविक्री करणाऱ्या दोघांना दिले पोलिसांच्या ताब्यात*

घुग्घुस:

चंद्रपुर तालुक्यातील उसगाव येथे महिला सरपंचांनी व सदस्यांनी मिळून गावात अवैध दारू पकडली असून दोन आरोपींना पकडून घुग्घुस पोलिसांच्या ताब्यात देण्यात आले आहे. उसगाव येथे महिलांची ग्रामस्वच्छता अभियान सुरू आहे. अशातच प्रत्येक गल्लीबोळात महिलांनी ही मोहीम राबवली असून गावात सुरू असलेली अवैध दारूविक्री हाणून पाडली.यावेळी वंदना बोबडे, जिजाबाई शांतलवार या दोन आरोपींना पोलिसांच्या ताब्यात देण्यात आले.

मागील दोन ते तीन वर्षांपासून उसगाव गावात काही महिला अवैध दारूविक्री करत आहेत.याबाबत घुग्घुस पोलिसांना महिलांनी अनेकदा निवेदने सुद्धा दिली होती. मात्र दारूबंदी करण्यात पोलीस अपयशी झाले.दारूमुळे गावात भांडणे वाढणे, शिवीगाळ करणे, छेडखाणी सारखे प्रकार नेहमी वाढत होते. तसेच गावात कायदा व सुव्यवस्थाचा मोठा प्रश्न निर्माण झाला होता.

दरम्यान आज शनिवारी उसगाव येथील महिला सरपंचांनी गावातील सदस्य व महिलांना एकत्र करत गावात ग्रामस्वच्छता मोहीम राबवली.यात मोठ्या प्रमाणात अवैध देशी दारू आढळून आली असून दोन महिला आरोपींना पकडले.त्यानंतर घुग्घुस पोलिसांना याची माहिती देण्यात आली.पोलिसांनी आरोपींना अटक केली असून अवैध दारू जप्त केली आहे.