परसोडा, कोठोडा (बु) येथील शेतकऱ्यांनी केले आरसीसीपीएल कंपनीविरोधात चक्काजाम आंदोलन, पोलिसांची शेतकऱ्यांसोबत अरेरावी

चंद्रपुर जिल्ह्यातील कोरपना तालुक्यातील परसोडा, कोठोडा (बु) येथील गावकऱ्यांनी आरसीसीपीएल कंपनी बंद पाडून चक्काजाम आंदोलन केले आहे. त्यामुळं कंपनीची वाहतूक बंद करण्यात आली आहे.दरम्यान कोरपना पोलिसांनी शेतकऱ्यांसोबत अरेरावी केली आहे. त्यानंतर गावकऱ्यांमध्ये रोष व्यक्त केल्या जात असून कंपनी व्यवस्थापन व प्रशासनामध्ये एकच खळबळ उडाली आहे.

परसोडा येथील RCCPL मुकुटबन  सिमेंट कंपनीला दिलेली लीज रद्द करा, नियमांचे उल्लंघन करून गावातून होणारी जड वाहतूक बंद  करण्याच्या मागणीसाठी परसोडा गावातील नागरिकांनी एका आठवड्या पूर्वी आमरण उपोषण केले होते.त्यानंतर प्रशासनाला निवेदन दिले मात्र अद्यापही कारवाई न झाल्याने हे पाऊल उच्चल्या जात आहे.

परसोडा येथील ग्रामसभेत RCCPL मुकुटबन कंपनीला ग्रामपंचायतने उत्खननाचे काम सुरू करण्यासाठी लीज दिली होती.मात्र अटी व शर्तीचे पालन न करता जमीन दलाला मार्फत खरेदी केल्या जात आहे.

RCCPL मुकुटबन सिमेंट कंपनीला परसोडा ग्रामपंचायतने खोदकाम करण्याअगोदर गावाच्या विकासासाठी निधी उपलब्ध करून देणे, परिसरातील संपूर्ण जमीन अधिग्रहित करणे, शेतकऱ्यांना 25 लाख रुपये एकर मोबदला देणे, एक सातबारा, एक नोकरी देणे, बेरोजगार युवकांना रोजगार देणे, जड वाहतूक बंद करणे प्रदुषण कमी करणे आदी समस्यां सोडवण्यासाठी ग्रामपंचायत ने ठराव मंजूर केला होता.मात्र कंपनी प्रशासनाने अद्यापही गावातील नागरिकांच्या समस्या सोडविल्या नाही.उलट दलालांमार्फत शेतकऱ्यांच्या जमिनी घेऊन खोदकाम सुरू केले आहे.त्यामुळं ग्रामपंचायत ने दिलेली लीज रद्द करण्याचा ठराव ग्रामपंचायत ने घेतला असून चंद्रपुर चे जिल्हाधिकारी विनय गौडा याना तसे निवेदन पाठविण्यात आले आहे.

मात्र अद्यापही कंपनीकडून उत्खनन सुरूच असून जड वाहतूक सुरू आहे.तसेच प्रदूषणामुळे शेतपिकांचे मोठ्या प्रमाणात नुकसान होत आहे.बेरोजगार युवकांना अद्यापही रोजगार मिळाला नाही.त्यामुळं कंपनीला दिलेली लीज रद्द करा, गावातून होणारी जड वाहतूक बंद करा, आदी मागण्यांना घेऊन 5 एप्रिलपासून गावकरी बेमुदत धरणे उपोषण केले असून वाहतूक रोखून धरली आहे.