कोलामगुड्यावरील वाचनालयाला पुस्तकांची भेट ।। कोलाम युवकांनी वाचन, लेखनाने समृद्ध व्हावे -अॅड. दिपक चटप

( सय्यद शब्बीर जागीरदार ) जिवती, ता ५ : कोलामगुड्यावरील समृद्धी अधोरेखित करायची असेल तर सर्वप्रथम कोलाम युवकांनी वाचन-लेखनांनी समृद्ध व्हावे. विकासाच्या मुळ प्रवाहात सामील होण्यासाठी हे एक प्रभावी माध्यम आहे व यासाठी प्रत्येक कोलाम युवकांनी आग्रही असले पाहिजे, असे मत चेव्हेनिंग स्काॅलरशिप विजेते अॅड दिपक चटप यांनी मांडले. यावेळी कोलाम विकास फाऊंडेशनचे अध्यक्ष विकास कुंभारे उपस्थित होते.

जिवती तालुक्यातील रायपूर (खडकी) या कोलामगुड्यावर कोलाम विकास फाऊंडेशन ने स्वातंत्र्य दिनी विर शामादादा कोलाम वाचनालय/अभ्यास केंद्र सुरू केले. या वाचनालयात परिसरातील कोलाम युवक नियमितपणे एकत्र येऊन चर्चा करतात. शिवाय येथे दररोज सायंकाळी लहान विद्यार्थी अभ्यासाला बसतात. अॅड दिपक चटप यांनी या विद्यार्थ्यांना व युवक युवतींना 'मी व माझे प्रश्न' या विषयावर मार्गदर्शन केले.

 अॅड दिपक चटप यांना इंग्लंड सरकारची चेव्हेनिंग स्काॅलरशिप मिळाल्याबद्दल विविध संस्थांनी त्यांचा सत्कार करताना भेट म्हणून दिलेली बहुमोल अशी ५० पुस्तके वाचनालयाच्या पुस्तकपेढीला दान दिली आणि शालेय विद्यार्थ्यांना नोटबुक, पाट्या व पेन्सिल भेट दिली. पुढील वर्षभरात पत्र लेखन, मुळाक्षरे व अंकलेखन याकडे लक्ष देऊन कोलाम युवकांनी व लहान विद्यार्थ्यांनी वाचन लेखनात तरबेज व्हावे, अशी अपेक्षा व्यक्त केली.

 यावेळी उपस्थित विद्यार्थी व गावकऱ्यांना मार्गदर्शन करताना संस्थेचे अध्यक्ष विकास कुंभारे यांनी सांगितले की, विविध योजना आणि विकास कामांच्या बाबतीत आपली होणारी गैरसोय, फसवणूक व लुबाडणूक यासाठी जागृत राहणे, एकजुटीने विचार विमर्श करून योग्य निर्णय करणे व आपल्या वरील अन्यायाचा प्रतिकार करण्याची ताकद निर्माण करणे यासाठी सदर वाचनालयाच्या प्लॅटफॉर्मचा कोलामांनी उपयोग करावा आणि प्रत्येक कोलाम युवकांनी आपले व्यक्तीमत्व उंचावण्यासाठी कसोशीने प्रयत्न करावेत.