आम्हाला पैसे नको हक्काचे घर द्या, घुग्घुस येथील अमराई वार्डातील नागरिकांची मागणी

नौशाद शेख (विशेष प्रतिनिधी): घुग्घुस येथे पोळ्याच्या दिवशी भूस्खलन होऊन घर जमिनीत गाडल्या गेल्याची घटना घडली होती.त्यानंतर परिसरातील नागरिकांना जिल्हा परिषद शाळेत ठेवण्यात आले.मंत्र्यांपासून तर आमदार खासदार जिल्हाधिकारी यांनी त्यांना मदत देण्याचे आश्वासन दिले.

मदत स्वरूपात तीन हजार रुपये सुद्धा काही परिवाराला देण्यात आले. मात्र 10 ते 12 लोकांनी ती मदत स्वीकारण्यास मनाई केली. त्यानंतर आता आम्हाला पैसे नको हक्काचे घर द्या अशी मागणी घुग्घुस येथील अमराई वार्डातील नागरिकानी शासनाकडे केली आहे.

अमराई वार्डात पोळ्याच्या दिवशी एका नागरिकाचे घर भूस्खलन होऊन जमिनीत दफन झाले.यात सुदैवाने मोठी जीवितहानी टळली.त्यानंतर सुरक्षेच्या दृष्टीने त्या परिवारासह इतर कुटुंबियांना जिल्हा परिषद शाळेत हलविले.

त्याच्या जेवणाची सोय नगरपरिषद मार्फत करण्यात येत आहे.मात्र आता काही नागरिकांनी जिल्हा प्रशासनाप्रति रोष व्यक्त केला असून आम्हाला तुमचे 3 हजार रुपये नको आहेत, आम्हांला हक्काचे घर द्या, व आमचे पुनर्वसन करा अशी मागणी नागरिकांनी केली आहे.