शेतकऱ्यांनी पेरलेले ओसवाल व विक्रांत कंपनीचे सोयाबीन उगवलेच नाही, शेतकऱ्यांची कृषी अधिकाऱ्यांकडे धाव

देवानंद ठाकरे (घुग्घुस प्रतिनिधि): शेतकऱ्यांनी पेरलेले ओसवाल व विक्रांत कंपनीचे सोयाबीन उगवले नसून, कंपनीने आमची फसवणूक केली आहे. कृषी विभागाने त्वरित पंचनामे करावे व नुकसानभरपाई द्यावी, अशी मागणी तालुक्यातील पांढरकवडा, वढा गावातील शेतकऱ्यांनी केली आहे.

वढा येथील सरपंच किशोर वरारकर यांनी चंद्रपुर तालुका कृषी अधिकाऱ्यांकडे धाव घेतली.त्यानंतर आज रविवारी कृषी अधिकारी  यांनी गावात येउन शेतकऱ्यांच्या शेतीची पाहणी केली,जवळपास 30 शेतकऱ्यांनी ही तक्रार कृषी अधिकारी यांच्याकडे केली आहे.

पेरणीयोग्य पाऊस आल्याने सोयाबीनची पेरणी शेतकऱ्यांनी केली. त्यानंतर पाऊस पडूनही सोयाबीन अंकुरले नाही, ओसवाल व विक्रांत कंपनीने आमची फसवणूक केली आहे. त्यामुळे शेतकऱ्यांचे मोठ्या प्रमाणात नुकसान झाले आहे. त्याचा परिणाम शेतकऱ्यांवर उपासमारीची वेळ आलेली आहे,असे शेतकऱ्यांनी म्हटले आहे.