पेरणीयोग्य पाऊस पडत नसल्याने शेतकरी चिंतेत, कर्ज कसे फेडायचे? शेतकऱ्यांना प्रश्न

देवानंद ठाकरे (घुग्घुस प्रतिनिधि): जून महिना संपत आला तरी जिल्ह्यात समाधानकारक पाऊस पडलेला नाही. कधी ऊन, कधी ढगाळ वातावरण, तर कधी रिमझीम पावसामुळे शेतकरी चिंतेत आहेत. पेरणीची कामे लांबणीवर जाण्याची शक्‍यता वर्तवण्यात येत आहे. चंद्रपुर तालुक्यातील घुग्गुस,उसगाव परिसरातील शेतकऱ्यांनी तूर,सोयाबीन ची पेरणी केली मात्र पावसाचा पत्ता नसल्यानं आता शेतकरी चिंतेत सापडला आहे.

पाऊस लवकर पडणार असल्याचा इशारा हवामान खात्याने वर्तवला होता. त्यामुळे जिल्ह्यातील काही शेतकऱ्यांनी सोयाबीन,तूर पेरणीची सुरू केली. जून महिन्याच्या दुसऱ्या आठवड्यापासून पावसाने हजेरी लावल्‍याने शेतकरी सुखावला होता आणि पेरणीची लगबगही सुरू झाली होती. मात्र पेरणीयोग्य पाऊस पडत नसल्याने काही शेतकऱ्यांनी पेरणी थांबवली.

पाऊस समाधानकारक पडत नसल्याने भात पेरणीवर परिणाम होण्याची भीती व्यक्त केली जात आहे. जिल्ह्यातील काही भागांत तुरळक पाऊस, तर काही भागात उन्हाळी वातावरण आहे. त्‍यामुळे दुबार पेरणीचे संकट शेतकऱ्यांपुढे निर्माण झाले आहे.