नांदानाल्यावरील पुलाची अजूनही नागरिकांना प्रतीक्षाच ।। रत्नाकर चटप यांनी ग्रामविकास मंत्री यांची घेतली भेट

मंगेश तिखट (प्रतिनिधी):  तालुक्यातील सर्वात मोठी ग्रामपंचायत असलेल्या नांदा गावातील पुलाचा प्रश्न गेल्या अनेक वर्षांपासून अजूनही प्रलंबित आहे. अमलनाला धरणाचा  स्त्रोत असलेल्या या नाल्यावर पुलाची व बंधाऱ्याची अत्यंत गरज आहे.  शेतकऱ्यांना व कामगारांना पावसाळ्यात पुरामुळे ताटकळत राहावे लागते. अद्यापही पुलाच्या बांधकामास सुरुवात झालेली नसल्याने  नागरीकांना मोठा त्रास सहन करावा लागत आहे.

अनेक वर्षापासून नागरीक त्रास सहन करत असून लोकप्रतिनिधींकडून  नागरिकांना केवळ आश्वासनच मिळत आहे. पावसाळ्यात शेतकऱ्यांना शेतीचे साहित्य पलीकडे नेता येत नसल्याने शेतातील काम खोळंबून राहतात. त्याचबरोबर यापूर्वी अनेक नागरिकांच्या व जनावरांचे पुरामुळे अपघातही  झालेले आहे. पुलाचे काम होइल अशी आशा शेतकर्‍यांना होती. अद्यापही कामं चालू न झाल्याने शेतकरी हवालदिल झाले आहे. या भागात बंधाऱ्याची गरज असून सिंचनाचा मोठा प्रश्न शेतकऱ्यांना भेडसावत आहे.

नांदा येथील हा नाला  बारमाही असून जवळपास दोनशेहून अधिक हेक्‍टर शेती सिंचनाखाली बंधाऱ्यामुळे येईल आणि याचा मोठा लाभ शेतकऱ्यांना उत्पादनात होऊ शकतो. जवळपास ७० मीटरचा हा पूल झाल्यास परिसरातील नांदा, आवाळपुर, राजुरगुडा, नोकारी, पालगाव आदी गावातील शेतकऱ्यांना तालुक्याच्या ठिकाणी जाण्यास सोयस्कर होईल. सदर मार्ग हा गडचांदूर आदीलाबाद अंतर मार्गाला जोडणारा असल्याने नागरिकांचा वेळ व खर्चही वाचेल. यासंदर्भात नुकतेच अखिल भारतीय सरपंच परिषदेचे जिल्हा सचिव तथा नांदा ग्रामपंचायतीचे माजी सदस्य रत्नाकर चटप यांनी मुंबई येथे ग्रामविकास मंत्री हसन मुश्रीफ यांची भेट घेऊन सदर नागरिकांच्या हिताच्या मुद्द्यांवर चर्चा करून लेखी निवेदन दिले. ग्रामविकास मंत्री यांनी सकारात्मक भूमिका घेतली आहे.