जिवती ते कुंभेझरी अर्धवट रस्ता अपघाताला देत आहे आमंत्रण वाहतुकीस धोकादायक

निधी अभावी रस्त्याचा काम अतिशय संथ गतीने सुरू

जिवती :-संपूर्ण जिवती तालुका अतिशय दुर्गम, नक्षलग्रस्त व डोंगराळ भाग म्हणून ओळखला जातो, या तालुक्याची निर्मिती सन २००२ मध्ये करण्यात आली. तेव्हा पासून संपूर्ण तालुक्यातील रस्त्यांची कामे कधीच झाली नव्हती पण मागील वर्षी मुख्यमंत्री ग्राम सडक योजनेच्या माध्यमातून तालुक्यातील जिवती ते कुंभेझरी या रस्त्याच्या कामांचे उद्घाटन खासदर बाळूभाऊ धानोरकर व आमदार सुभाष धोटे यांच्या हस्ते करण्यात आले.

पण आज घडीला तालुक्यातील काही रस्त्याचे काम अद्यापही ठप्प आहेत, त्यातीलच एक रस्ता म्हणजे जिवती ते कुंभेझरी हा आहे. या रस्त्याचे काम मुख्यमंत्री ग्राम सडक योजनेच्या निधी अभावी अतिशय संथ गतीने सुरू असल्याची माहिती आहे. जिवती परिसरातील काही रस्त्यांची मोठया प्रमाणात दुरवस्था झाली आहे. त्याही रस्त्यांची कामे अत्यंत संथ गतीने सुरू आहेत. जिवती ते कुंभेझरी या रस्त्यावर काही ठिकाणी तर नुसती गिट्टी टाकून ठेवली आहे तर काही ठिकाणी गिट्टीवर मुरूम कमी प्रमाणात टाकला आहे. दिड वर्ष उलटून गेले तरी, पुढील काम सुरू केले जात नसल्याने वाहनचालकांसह परिसरातील रहिवासी त्रस्त झाले आहेत. रस्ता करायचा नव्हता तर, चांगला रस्ता उखडून ठेवला कशाला, असा प्रश्न यानिमित्ताने केला जात आहे.

कुंभेझरी कडे जाण्यासाठी जिवती येथील रहिवाशांना हाच एक मुख्य मार्ग आहे. या रस्त्यांची कामे मुख्यमंत्री ग्राम सडक या योजनेच्या निधीतून केले जात आहे. डिसेंबर २०२० रोजी या कामांचे उद्घाटन करण्यात आले. तर काम पूर्ण करण्याचा दि. डिसेंबर २०२१ असताना सुद्धा आजपर्यंत अर्धवटच काम झाल आहेे. उद्घाटन झाल्या नंतर काम जदल गतीने होईल, अशी अपेक्षा होती, परंतु दिड वर्ष होत आले तरी कामाला म्हणावी तशी गती नसल्याने वाहनचालक त्रस्त झाले आहेत. यात प्रामुख्याने जिवती ते कुंभेझरी या रस्त्याची अवस्था अत्यंत बिकट झाली आहे.

नवीन रस्ता होणार म्हणून नागरिकांमध्ये आनंदाचे वातावरण होते. पण, संपूर्ण रस्ता खोदून काढल्यानंतर या रस्त्याच्या पुढील कामाला जशी म्हणावी तशी सुरुवात झाली नाही. गिट्टी व मुरूम टाकून ठेवलेल्या या मार्गावरून वाहन चालविणे आता खूपच अवघड झाले आहे.

या रस्त्याचे संथ गतीने काम सुरू आहे तर, गिट्टी व मुरूम टाकलेला हा रस्ता खड्डेमय झाला आहे. वाहनधारक खड्डे वाचविण्यासाठी मिळेल त्या मार्गाने वाहन नेतात. परिणामी हा मार्ग अपघातास निमंत्रण देणारा ठरत आहे  या रस्त्याचे काम अत्यंत कासवगतीने सुरू आहे, हा संपूर्ण मार्ग धोकादायक झाला असून, काम तातडीने पूर्ण करा. सुरक्षित वाहतूक व्यवस्थेला मदत करा, अशी मागणी करण्याची वेळ नागरिकांवर आली आहे.

या रस्त्याचे काम का गतीने केले जात नाही, हाच प्रश्न पडतो. जिवती ते कुंभेझरी हा रस्ता अद्याप पूर्ण झाला नाही. अर्धवट कामामुळे नागरिक त्रस्त आहेत. हे काम तातडीने पूर्ण करावे अन्यथा नागरिकांसमवेत आम्हाला आंदोलनाशिवाय पर्याय राहणार नाही. संथ गतीने होणाऱ्या या कामास पूर्णत: प्रशासन जबाबदार आहे.

संतोष इंद्राळे रहिवासी, 
जिवती

राज्य सरकार कडून मुख्यमंत्री ग्राम सडक योजनेचा निधी उपलब्ध होत नसल्याने या रस्त्याचे काम थांबलेे आहे, तसेच व मजुराच्या उपलब्धते अभावी काम रखडले आहे.

गणेश मारलावार, कंत्राटदार