अवैध मटका त्वरीत बंद करण्याची डॉ. प्रकाश खनके यांची मागणी...

कोरपना (प्रतिनिधी):  कोरपना तालुक्यात राजरोसपणे  अवैध मटका, जुगार, बंदी असलेल्या गुटख्याच्या विक्रीने कळस गाठला असून, अनेक वेळा पोलिसांतील वरिष्ठांकडे तक्रार करूनही  उपाययोजना न केल्यामुळे, अखेर डॉ प्रकाश खनके  यांनी याविषयी थेट राज्याचे गृहमंत्री यांच्याकडे  तक्रारीचे सविस्तर निवेदन पाठवून कोरपना तालुक्यात सर्रासपणे चालू असलेल्या अवैध धंद्यांना आळा घालण्याविषयी विनंती केली आहे.

निवेदनात नमूद केले आहे की, उपरोल्लेखित सर्व अवैध व्यवसाय कोरपना तालुक्यातील बिनदिक्कत सुरू आहेत.  स्वत: खनके यांनी याविषयी जिल्हा पोलीस अधीक्षकांची प्रत्यक्ष अवैध धंदे बंद करण्याची विनंती केली होती. तसेच कुठलीही भीती न बाळगता खुलेआम मोठ्या प्रमाणावर चालू असलेल्या या अवैध धंद्यांना पोलिसांचे पाठबळ वा मूकसंमती तर नाही ना? अशी शंकाही त्यांनी निवेदनातून व्यक्त केलेली आहे.

बेकायदेशीर मटका, जुगार , दारू मुळे आदिवासी बहुल तालुक्यातील सुशिक्षित युवापिढीसह शेतकरी, शेतमजुर व्यसनाधीन झाले असून, शेकडो कुटुंब उध्वस्त झालेली आहेत. अनेक तरुणांचे व्यसनाधीनतेपायी बळी गेलेले आहेत. त्यामुळे जनतेकडून हे सर्व अवैध धंदे बंद करण्याची मागणी होत असल्याने, मी जातीने याविषयी अनेकवेळा प्रयत्न केले आहेत. परंतु, पोलिसांकडून हे धंदे बंद करण्याविषयी सहकार्य मिळत नाही. 

त्यामुळे याविषयीचे गांभीर्य लक्षात घेऊन आमच्या मतदारसंघातील सर्व बेकायदेशीर व्यवसाय विनाविलंब बंद करण्याविषयी संबंधितांना आदेशित करावे, अशी विनंती गृहमंत्री यांना करण्यात आलेली आहे. तसेच याविषयी त्वरीत कार्यवाही न झाल्यास पोलीस प्रशासनासह शासनही हे धंदे बंद करण्यासाठी टाळाटाळ करीत आहे असे गृहीत धरून मला लोकशाहीमार्गाने आमरण उपोषण करावे लागेल. 

दरम्यानच्या काळात मला मानसिक, शारिरीक इजा झाल्यास वा प्राणहानी झाल्यास त्यास आपले शासन व पोलीस प्रशासन जबाबदार राहील,असा इशारा डॉ प्रकाश खनेके माझी जिल्हा उपाध्यक्ष शिवसेना पार्टीचे  यांनी निवेदनाद्वारे दिलेला आहे.