आर्थिक व्यवहारातून अवैध वाळू तस्करीतील वाहनांना वरिष्ठ, कनिष्ठांपासून खुलीसूट.

तस्करीतील तीन ट्रॅक्टर सोडत 96 हजार रु लाचखोरी केल्याच्या चर्चेला उधाण.

ब्रह्मपुरी :- तीन दिवसा अगोदर एका वरिष्ठ अधिकाऱ्याने आपल्या अधिकाराचा गैरवापर करत अवैध वाळू तस्करी तील वाहन अर्थपूर्ण व्यवहार व मोठ्या राजकीय प्रभावाने सोडल्याची चर्चा शहरात रंगली असतांनाच काल रात्रो ११ वाजताच्या सुमारास अवैध वाळू तस्करी करित असलेल्या तीन ट्रॅक्टर मालकांकडून सुमारे ९६ हजार रुपये घेऊन सोडल्याची घटना मौशी- तोरगाव फाट्या जवळ घडली असल्याच्या चर्चेला ऊत आला आहे.

मौशी - तोरगाव फाट्याजवळ नागभिड कडे जाणाऱ्या एका ट्रॅक्टरला मंडळ अधिकारी व तलाठी यांनी थांबवून रॉयल्टी मागितली असता रॉयल्टी नसल्यानें त्यांचेकडून तेरा हजार रुपये घेऊन सोडण्यात आले. नंतर थोड्याच वेळात दोन ट्रॅक्टर अवैध वाळू भरून आल्याने त्यांच्या कडून सुद्धा रॉयल्टी मागितली असता त्यांच्या कडेही रॉयल्टी नसल्यानें त्यांचेकडून ८३ हजार रुपये घेण्यात आल्याची घटना खमंग चर्चेत आहे.

तालुक्यातील वाळू घाटाचे लिलाव झाले व टीप्पर,हायवा धारकांना वाटेल तेवढी वाळू परवानाधारक मालकांकडून दिली जाते मात्र ट्रॅक्टर धारकांना दिवसातून फक्त एक ब्रासची रॉयल्टी पाच हजार रु प्रमाणे मिळत आहे व प्रति ब्रास वाळू ट्रिप अठराशे ते दोन हजार रुपये किमतीने विकत असल्याने ट्रॅक्टर धारक एकाच रॉयल्टी वर लपून अवैध वाळू तस्करी करीत असून प्रसंगी आम्हाला वरिष्ठ ते कनिष्ठ वर्गाला आर्थिक व्यवहार करूनच तस्करी करावी लागत असल्याचे एका ट्रॅक्टर धारकाने आपले मनोगत व्यक्त केले.

लोकप्रतिनिधी व पक्षांतर्गत असलेले नेते अथवा कार्यकर्त्यांनी आपल्या तालुका व शहरातील नागरिकांसाठी असलेल्या समस्या व गंभीर मुद्द्यांबाबत एकजुटीने प्रयत्न केल्यास वा भ्रष्ट व कामचोर अधिकाऱ्यांना धारेवर धरल्यास समस्येचे निराकरण नक्कीच होणे आहे मात्र तसे होताना तालुक्यात दिसून येत नाही ही शोकांतिका आहे.