तूर उत्पादक शेतकऱ्यांच्या नुकसानीचे पंचनामे करा

ॲड. वामनराव चटप यांच्या मागणीला यश

मंगेश तिखट (प्रतिनिधी कोरपना): चंद्रपूर जिल्ह्यातील राजुरा, कोरपना, जिवती, गोंडपिपरी, सावलो, पोंभुणां, बल्लारपूर, चंद्रपूर, वरोरा, भद्रावती व चिमुर या तुर उत्पादक तालुक्यातील खरिपातील तुरीचे पिक उभे वाळत असल्यामुळे या तुर उत्पादक तालुक्यातील शेतक-यांच्या तुरीच्या पिकाचे पंचनामे करून वस्तुस्थिती दर्शक अहवाल सर्व तहसिलदारांना आदेश देवून मागविणे गरजेचे आहे. त्यामुळे तहसीलदारांना आदेश निर्गमित करून पिकांचे पंचनामे करायला लावा अशी मागणी माजी आमदार तथा शेतकरी नेते ॲड. वामनराव चटप यांनी जिल्हाधिकारी यांच्याकडे निवेदनातून केली होती. या मागणीची जिल्हाधिकारी यांनी सकारात्मक दखल घेतली असून सर्व तहसीलदारांना पिकांचे पंचनामे करून अहवाल सादर करण्याचे निर्देश दिले आहे.

तुरीचे हाती आलेले पिक उभे वाळल्यामुळे तुर उत्पादक शेतकऱ्यांचे प्रचंड नुकसान आहे. शासनाच्या एस.डी.आर.एफ./ एन.डी. आर. एफ. च्या निकषाप्रमाणे ३३ टक्केपेक्षा जास्त नुकसान झालेल्या शेतकऱ्यांना अनुदान देय आहे. त्यामुळे तुर उत्पादक शेतकऱ्यांना न्याय मिळण्याच्या दृष्टीने विषयांकीत सर्व तालुक्यातील तहसिलदारांना तुरीच्या शेतातील उभ्या वाळलेल्या / उभवलेल्या पिकाचे तात्काळ पंचनामे करून अहवाल मागविणे आवश्यक आहे असे मत ॲड. चटप यांनी मांडले.

जिल्ह्यातील तुर उत्पादक राजुरा, कोरपना, जिवती, गोंडपिपरी, सावली, पोंभुर्णा, बल्लारपूर, चंद्रपूर, वरोरा, भद्रावती व चिमुर या तालुक्यातील तहसिलदारांकडून यथाशिघ्र अहवाल मागविण्यात यावा व तुर उत्पादक शेतकऱ्यांच्या नुकसानीबाबतचा अहवाल सादर करावा असे निर्देश जिल्हाधिकारी कार्यालयातून सर्व तहसीलदारांना देण्यात आले आहे.