ब्रम्हपुरी येथे सत्तर हजाराची घरफोडी

ब्रह्मपुरी : घरचे बाहेरगावी गेल्याची संधी साधून चोरट्यांनी ७० हजारांचा मुद्देमाल लंपास केल्याची घटना शुक्रवार रात्रीच्या सुमारास ब्रम्हपुरी शहरातील पटेल नगरात घडली आहे . या प्रकरणाची तक्रार पोलिसांत करण्यात आली आहे . ब्रम्हपुरी शहरातील पटेल नगरात नितीन अग्रवाल राहतात . ते आपल्या कुटुंबीयांसह गोवा येथे पुतणीच्या लग्नासाठी गेले असता , अग्रवाल कुटुंबीय बाहेरगावी गेल्याची संधी साधून चोरट्यांनी त्यांच्या घरात प्रवेश केला . घरातील ५५ हजार रुपये रोख आणि १५ हजार रुपयांचे चांदीचे शिक्के असा एकूण ७० हजार रुपयांचा मुद्देमाल लंपास केला . दुसऱ्या दिवशी सकाळी अग्रवाल यांचे दिवाणजी घराकडे गेले . तेव्हा घराच्या मुख्य दरवाज्याचे कुलूप तोडलेले दिसले . तेव्हा त्यांनी याची माहिती नितीन अग्रवाल यांना दिली . त्यानंतर याची माहिती पोलिसांनाही देण्यात आली . पोलिसांनी घटनास्थळी दाखल होत श्वानपथकच्या माध्यमातून चोरट्यांच्या शोध घेण्याचा प्रयत्न केला गेला. घटनेचा पुढील तपास पोलिस निरीक्षक रोशन यादव यांच्या मार्गदर्शनाखाली सहायक पोलीस निरीक्षक आशीष बोरकर , मुकेश गजबे , योगेश शिवणकर , सावसाकडे करीत आहेत .