अवकाळी पावसामुळे शेत पिकांचे मोठे नुकसान ।। पंचनामे करून आर्थिक मदत आणि वीजबिल व कर्ज संपवा.

शेतकरी संघटनेची मुख्यमंत्री यांचेकडे मागणी

सय्यद शब्बीर जागीरदार (जिवती प्रतिनिधी) : संपूर्ण महाराष्ट्रात नुकताच अवकाळी पाऊस व गारपीट आल्याने गहु, हरभरा, मिरची, कापूस, फळझाडे व भाजीपाला या शेतमालाचे मोठ्या प्रमाणात नुकसान झाले आहे. या पीडित शेतकर्‍यांच्या शेताचे पंचनामे करून त्यांना आर्थिक मदत द्यावी आणि शेतकर्‍यांवर असलेले कर्ज संपवून वीजपंपाचे वीज बिल माफ करावे, अशी मागणी राज्याचे मुख्यमंत्री, अर्थमंत्री, कृषिमंत्री व महसूलमंत्री यांचेकडे शेतकरी संघटनेचे जेष्ठ नेते माजी आमदार ॲड.वामनराव चटप, प्रांताध्यक्ष ललित बहाळे, माजी आमदार सरोज काशीकर, शैलाताई देशपांडे, सतीश दाणी, ॲड.शरद कारेकर, अरुण पाटील नवले, सुधीर सातपुते, राजेंद्र ठाकूर, अरुण मुनघाटे, मदन कांबळे, सौ.ज्योत्स्ना मोहितकर, सौ.पौर्णिमा निरंजने, ॲड.श्रीनिवास मुसळे, निळकंठराव कोरांगे, सुधीर सातपुते, प्रा.निलकंठ गौरकार, शालीक नाकाडे, दादा नावलाखे, कवडू येनप्रेडीवार, घिसू पाटील खुणे, डॉ.संजय लोहे, पंढरी बोंडे, दिनकर डोहे यांनी केली आहे.

महाराष्ट्रातील अनेक जिल्ह्यात मोठ्या प्रमाणात अवकाळी पाऊस आला असून अनेक ठिकाणी गारपीट झाले आहे. सतत तीन दिवस पाऊस आल्याने अनेक जिल्ह्यात शेतकर्‍यांच्या शेतातील पिकांचे मोठे नुकसान झाले आहे. शेतकऱ्यांचे हरभरा, कापायला आलेली किंवा कापून ठेवलेली तूर,रब्बी सोयाबीन,मिरची, कापूस, फळबागा व भाजीपाला या पिकांचे मोठे नुकसान झाले आहे. यावर्षी कापूस पिकाला बोंडअळी आल्याने तसेच अवेळी पाऊस आल्याने बोंडसड झाल्याने, सोयाबीन पिकाचे कमी उत्पन्न आल्याने तसेच तुरीचे उभे पीक वाळून गेल्याने आधीच शेतकरी संकटात सापडला आहे. या शेतकर्‍यांना मदतीचा हात देणे गरजेचे आहे. गेल्या तीन वर्षापासून दुष्काळ असल्याने शेतकऱ्यांचे विजेचे बिलही थकीत आहे. 

शेतकऱ्यांची बिकट परिस्थिती लक्षात घेता सरकारने या शेतकऱ्यांच्या शेताचे तातडीने पंचनामे करण्याचे आदेश देऊन त्यांना आर्थिक मदत द्यावी, वीज पंपाचे थकीत वीज बिल माफ करावे, सर्व शेतकर्‍यांवरील कर्ज माफ करावे, अशी मागणी शेतकरी संघटनेने केली आहे.