कणसांंत हुरडा भरल्याने पक्ष्यांचा किलबिलाट !  

सप्टेंबर महिन्याच्या अखेरीस झालेल्या दमदार पावसामुळे तालुक्यातील पिकांना जीवदान मिळाले आहे.

भारतीय वार्ता  दि. 5: सहा वर्षांच्या दुष्काळी परिस्थितीनंतर वणी विधानसभा क्षेत्रातील तालुक्यात यंदा बहरलेल्या ज्वारीच्या पिकांंमुळे शेतकर्‍यांमध्ये समाधानाचे वातावरण आहे. यावर्षी सप्टेंबर महिन्याच्या अखेरीस झालेल्या दमदार पावसामुळे तालुक्यातील पिकांना जीवदान मिळाले आहे. यामुळे रब्बी हंगामातील गहू, हरभरा व मका आदी सर्वच पिके जोमात आली आहेत. सध्या ज्वारीचे पीक निसवून कणसे बाहेर पडू लागल्याने टचटचीत भरलेल्या कणसांचे दाणे खाण्यासाठी पाखरांचा वावर वाढत असून पक्ष्यांचा किलबिलाट सुरू आहे.
            मागील सहा ते सात वर्षाच्या तुलनेत भूगर्भात यावर्षी पाण्याच्या पातळीत कमालीची वाढ झाल्यामुळे तलाव, विहिरी, तर काही ठिकाणच्या ओढ्या-नाल्यातून अजूनही पाणी वाहत आहे. यामुळे तालुक्यातील  गावांमध्ये शेतकर्‍यांनी रब्बी हंगामात ज्वारी पिकाची मोठ्या प्रमाणात पेरणी केली आहे. पीक वाढीसाठी यंदा हवामानही अनुकूल असल्याने सध्या ज्वारीसह रब्बी हंगामातील इतर पिकांची वाढही जोमात झाली आहे. सध्या ज्वारीचे पीक निसवून कणसे बाहेर पडू लागल्याने टचटचीत हुरडा भरलेल्या कणसांचे दाणे खाण्यासाठी बहरलेल्या पिकात पाखरांचा वावर वाढत चालला आहे. शेतकर्‍यांना पिकांची राखण करण्यासाठी वेगवेगळ्या प्रकारची शक्कल करण्यासाठी अधिक मेहनत घ्यावी लागत आहे. मात्र, मजुरीचे दर गगनाला भिडले आहेत तर शेतीमालाला बाजारपेठेत अपेक्षित दर मिळत नसल्यामुळे शेतकरी आर्थिक संकटात सापडला आहे. यंदा पाण्याची स्थिती चांगली असल्यामुळे शेतकरी विविध पीक घेत आहे. तशी मशागत सुद्धा जोमात करीत आहे, सर्वांना जगवण्या साठी धावपळ मात्र कायम आहे.