वीज थकबाकी वसुलीची मोहीमेला मदत करा :नितीन राऊत

अधिवेशन संपताच ऊर्जामंत्र्यांनी स्थगिती उठवली 

भारतीय वार्ता (प्रतिनिधी) : कर्ज व थकबाकीमुळे महावितरणची आर्थिक स्थिती नाजूक आहे. महावितरण ही जनतेची कंपनी असून तिला वाचविणे व सक्षम करणे ही आपल्या सर्वांची जबाबदारी आहे, असे सांगताना वीजबिलाच्या वसुलीला दिलेली स्थगिती उठवण्यात येत असल्याची घोषणा ऊर्जामंत्री नितीन राऊत यांनी आज विधानसभेत केली. 
विजेच्या थकबाकीच्या वसुलीसाठी महावितरणने मोठी मोहीम सुरू केली होती. भाजप व मनसे बरोबरच आघाडीतील राजू शेट्टी यांनीही या विरोधात आंदोलन पुकारले होते. अधिवेशनातही याचे पडसाद उमटले, तेव्हा 2 मार्च रोजी उपमुख्यमंत्री अजित पवार यांनी वसुलीला तात्पुरती स्थगिती दिली होती. ही स्थगिती उठवण्यात येत असल्याचे निवेदन ऊर्जामंत्री नितीन राऊत यांनी विधानसभेत केले. कोरोनाच्या संकटात महानिर्मिती, महापारेषण, महावितरणने अनेक नैसर्गिक व आर्थिक संकटांचा सामना करून वीज ग्राहकांचा पुरवठा सुरळीत ठेवला आहे. जानेवारीपर्यंत कोणाचाही वीज पुरवठा बंद करण्यात आलेला नाही. 
मात्र महावितरणची थकबाकी आता 71 हजार 506 कोटींवर गेली आहे. महावितरणवर 46 हजार कोटी रुपयांचे कर्ज झाले असून, खरेदी केलेल्या विजेचे  12 हजार 700 कोटी रुपये देणे आहे. वसुलीसाठी कृषी ग्राहकांना भरघोस सवलती दिल्या आहेत. मात्र महवितरणची थकबाकी जर अशीच वाढत राहिली तर ते महावितरणच्या दृष्टीने धोक्याचे ठरणार आहे. त्यामुळे वासुलीवरील स्थगिती उठवण्यात येत असून सर्वांनी सहकार्य करावे, असे आवाहन नितीन राऊत यांनी केले .