कोरोनाच्या पार्श्वभुमीवर गणेशोत्सव साधेपणाने साजरा करण्याचे आवाहन..!

प्रशासनातर्फे मार्गदर्शक सुचना जारी

उमेश तपासे (चंद्रपूर-जिल्हा-प्रतिनिधी): कोविड-19 मुळे उद्भवलेल्या संसर्गजन्य परिस्थितीचा विचार करता यंदाचा गणेशोत्सव साध्या पद्धतीने साजरा करण्याचे आवाहन जिल्हा प्रशासनाने केले आहे. याबाबत जिल्हा प्रशासनाकडून मार्गदर्शक सूचना जारी करण्यात आल्या आहेत.
सार्वजनिक गणेशोत्सवासाठी गणेशोत्सव मंडळांनी महापालिका तसेच स्थानिक प्रशासनाची त्यांच्या धोरणानुसार यथोचित पूर्वपरवानगी घेणे आवश्यक राहील. कोविड-19मुळे उद्भवलेल्या संसर्गजन्य परिस्थितीचा विचार करता महापालिका तसेच संबंधित स्थानिक प्रशासनाचे मंडपांबाबतचे धोरण याच्यांशी सुसंगत असे मर्यादित स्वरुपाचे मंडप उभारण्यात यावेत. 

श्री गणेशाची मूर्ती सार्वजनिक मंडळांकरीता 4 फूट व घरगुती गणपती मूर्ती 2 फूटांच्या मर्यादेत असावी. यावर्षी शक्यतो पारंपारिक गणेशमूर्ती ऐवजी घरातील धातू, संगमरवर इत्यादी मूर्तींचे पूजन करावे. मूर्ती शाडूची, पर्यावरणपूरक असल्यास त्याचे विसर्जन शक्यतो घरच्या घरी करावे. विसर्जन घरी करणे शक्य नसल्यास नजीकच्या कृत्रिम विसर्जनस्थळी विसर्जन करण्यात यावे.    

उत्सवाकरीता वर्गणी, देणगी स्वेच्छेने दिल्यास त्यांचा स्वीकार करावा. जाहिरातीच्या प्रदर्शनामुळे नागरिक आकर्षित होऊन गर्दी होणार नाही, याकडे लक्ष द्यावे. तसेच आरोग्यविषयक व सामाजिक संदेश असलेल्या जाहिराती प्रदर्शित करण्यास पसंती देण्यात यावी. सांस्कृतिक कार्यक्रमाऐवजी सामाजिक अंतर  राखून आरोग्य विषयक उपक्रम, रक्तदान यासारखी शिबिरे आयोजित करण्यास प्राधान्य द्यावे आणि त्याद्वारे कोरोना, मलेरिया, डेंग्यू व इतर आजार आणि त्यांचे प्रतिबंधात्मक उपाय तसेच स्वच्छता याबाबत जनजागृती करावी.
कोरोनाच्या पार्श्वभुमीवर शासनातर्फे वेळोवेळी निर्गमित केलेल्या परिपत्रकानुसार इतर निर्बंध कायम राहतील. त्यामध्ये गणेशोत्सवानिमित्त कोणतीही शिथिलता देता येणार नाही. आरती, भजन,कीर्तन वा अन्य धार्मिक कार्यक्रम आयोजित करतांना गर्दी होणार नाही, याची दक्षता घ्यावी. तसेच ध्वनी प्रदूषणासंदर्भातील नियमांचे व तरतुदींचे काटेकोरपणे पालन करण्यात यावे.

श्रीगणेशाच्या दर्शनाची सुविधा ऑनलाईन, केबल नेटवर्क, वेबसाईट व फेसबुक इत्यादी माध्यमातून उपलब्ध करून देण्याबाबत जास्तीत जास्त व्यवस्था करावी. गणपती मंडपामध्ये निर्जंतुकीकरणाची तसेच थर्मल स्क्रीनिंगची पर्याप्त व्यवस्था ठेवावी. प्रत्यक्ष येऊन दर्शन घेऊ इच्छिणाऱ्या भाविकासाठी शारीरिक अंतराचे तसेच स्वच्छतेचे नियम पाळण्याकडे विशेष लक्ष द्यावे.

गणपतीचे आगमन व विसर्जन मिरवणुका काढण्यास मनाई करण्यात येत आहे. विसर्जन स्थळी होणारी आरती घरीच करून विसर्जन स्थळी कमीत कमी वेळ थांबावे. लहान मुले आणि ज्येष्ठ नागरिकांनी सुरक्षेच्या दृष्टीने विसर्जनस्थळी जाणे टाळावे. संपूर्ण चाळीतील, इमारतीतील सर्व घरगुती गणेशमूर्तीच्या विसर्जनाची मिरवणूक एकत्रितरीत्या काढण्यास सक्त मनाई आहे.   महापालिका, विविध मंडळे,गृहनिर्माण संस्था,लोकप्रतिनिधी, स्वयंसेवी संस्था इत्यादींच्या मदतीने गणेशमुर्तीच्या विसर्जनाकरीता कृत्रिम तलावांची निर्मिती करण्यात यावी.
कोरोना विषाणूचा प्रादुर्भाव रोखण्यासाठी शासनाने तसेच स्थानिक महापालिका, पोलिस, स्थानिक प्रशासन यांनी विहित केलेल्या नियमांचे अनुपालन करणे बंधनकारक राहील, असे आदेशात नमुद आहे