४५ लाखाच्या लूटमार प्रकरणातील आरोपीला चार दिवसांची पोलीस कोठडी

वणीः पोलीस ठाण्याच्या हद्दीत येणा-या ब्राम्हणी मार्गावरील जिनिंग नजिक ४५ लाख रूपयांची रक्कम दुचाकीने घेवून जातांना एकाला लूटल्याची घटना घडली होती. प्रसंगी तब्बल आठ महिन्यानंतर यातील आरोपीला पकडण्यात पोलीसांना यश आले. त्याला न्यायालयात हजर केले असता न्यायालयाने चार दिवसांची पोलीस कोठडी दिली आहे.

२० मार्च रोजी जिनींग मध्ये कार्यरत असलेला मनिष जंगले या कर्मचा-याने ४५ लाखाची रक्कम शहरातील बॅंक ऑफ इंडियाच्या शाखेतून काढून तो दुचाकीने ब्राम्हणी मार्गावरील जिनिंगकडे जात असतांना मागून येणा-या इंडिगो कार मधील लोकांनी त्याला थांबवून ४५ लाख रूपये हिसकावून पळ काढला असल्याची तक्रार देण्यात आली होती.

त्यावरून गुन्हे दाखल करून पोलीसांनी तपासचक्रे फिरविली होती. दरम्यान २५ दिवसांनी यातील बाबूलाल बिश्नोई याला अटक केली होती. मात्र इतर आरोपी गेल्या आठ महिन्यांपासून पसार होते. यातील ओमप्रकाश चेताराम बिश्नोई हा राजस्थान मध्ये असल्याची माहिती मिळताच उपविभागीय पोलीस अधिकारी संजय पुजलवार यांचे मार्गदर्शनात सहायक पोलीस निरीक्षक संदीप एकाडे,गजानन गोडंबे, विशाल गेडाम,इम्रान खान ही चमू राजस्थानात पोहचली आणि ओमप्रकाश याला १५ डिसेंबरला ताब्यात घेतले. त्याला अटक करून वणीच्या न्यायालयासमोर शनिवारी हजर केले असता ओमप्रकाश बिश्नोई ला न्यायालयाने २१ डिसेंबर पर्यंत पोलीस कोठडी सुनावली आहे. या चार दिवसाच्या कोठडीत पोलीसांना आणखी काही धागे गवसणार की नाही हे कळणार आहे.