चंद्रपूर जिल्ह्यातील मजूराचा खडकी येथील शेतकऱ्याच्या शेतात मृत्यू..!

आशिष साबरे यवतमाळ जिल्हा प्रतिनिधी) झरी: तालुक्यातील  मुकुटबन येथून तीन किमी अंतरावरील खडकी गावाजवळ जवळ असलेल्या रेल्वे गेटच्या जवळील शेतात एका मजुरांचा सोयाबीन काढत असतांना थ्रेशरमध्ये पडल्याने त्याचा जागीच मृत्यू झाला. चंद्रपूर जिल्ह्यातील  विलास भूदाजी तोडासे वय अंदाजे ५५ वर्ष रा भाटाडी ता. पोंडूर्ण  येथील  रहिवासी आहे. 

चंद्रपूर जिल्ह्यातील  सोयाबीन काढणाऱ्या लोकांची गॅंग झरी तालुक्यात आले आहे. व शेतकऱ्यांचे सोयाबीन थ्रेशरने काढून देण्याचे काम सुरू आहे. याच गँग मधील काही लोक खडकी येथील विठ्ठल ठावरी यांच्या शेतात थ्रेशर घेऊन सोयाबीन काढण्याचे काम करीत होते. दीपावली असल्याने हे मजूर आज सर्व कामे करून आपापल्या घरी जाण्याच्या तयारीत असताना  ३० ऑक्टोबर रोजी अचानक  मजूर विलास तोडासे यांचा सोयाबीन काढतांना अडकून थ्रेशरमध्ये तोल जाऊन थ्रेशरच्या पट्ट्यावर  पडल्याने तो सरळ थ्रेशरच्या आत मध्ये कमरेपर्यंत गेल्याने अर्धे शरीर छिंनविच्छिन्न झाले व त्याचा जागीच दुर्दैवी मृत्यू झाला. अपघाताची माहिती खडकी,मुकुटबन,गणेशपूर व अडेगाव पर्यंत वाऱ्यासारखी पसरताच हजारो लोकांची गर्दी पाहण्याकरिता उसळली. घटनास्थळी सामाजिक कार्यकर्ते राजू लोंढे व पोलीस पाटील मंगेश बरडे हजर होते त्यांनी पोलिसांना माहिती दिली.  पोलीस उपनिरीक्षक राजू नेवारे व पोलीस नाईक संतोष मडावी घटनास्थळी पोहचले. पंचनामा सुरू होता. पंचनामा करून शव शविच्छेदन करिता झरी येथे पाठविण्यात येणार आहे.