हिवरा मजरा येथे पावसाने कोसळले घर..!

भर पावसाळ्यात कुटुंबाचा संसार आला उघड्यावर..!

आशिष साबरे (वणी विभागीय प्रतिनिधी) : मागील 15 ते 20 दिवसांपासून पावसाची संततधार सुरू आहे अशातच शनिवारी रात्रीच्या दरम्यान हिवरा ( मजरा) येथे मातीचे जुने घर पावसाचा ताण सहन करू न शकल्याने कोसळले. यामध्ये सदर कुटुंबाचे लाखो रुपयांचे आर्थिक नुकसान झाले असून सुदैवाने या घटनेमध्ये कोणतीही जीवितहानी झाली नाही. यावर्षी पावसाळा लांबला असल्याचे चिन्ह दिसत आहे. अशातच गेल्या काही दिवसांपासून मारेगाव तालुक्यात पावसाची संततधार सुरू आहे. शनिवारी सायंकाळच्या दरम्यान हिवरा (मजरा ) येथे मुसळधार पावसामुळे शंकर सूर्यभान वाघमारे यांचे मातीचे घर पावसाचे  पाणी सतत भिंतीत मुरल्यामुळे कोसळले.

दिवसाची वेळ असल्याने घर कोसळण्याची कल्पना आल्याने घरातील मंडळी बाहेर निघाली होती. मात्र शंकर वाघमारे यांच्या घरातील वस्तूंचे मोठे नुकसान झाले. यात जवळपास दीड लाखांचे आर्थिक नुकसान झाल्याचा प्राथमिक अंदाज आहे. तालुका प्रशासनाने पंचनामा करून सदर कुटुंबाला नुकसान भरपाई द्यावी अशी मागणी शंकर वाघमारे यांनी केली आहे.